Chjama a puesia e risponde a ghjunventù

31 Déc 2017 | Blog "A Voce Rivolta"

Da qualchi anni si sentia chi u rinnovu di l’arte anticu di u chjam’e ripondi era in anda, a l’uccasione di a serata in Pigna tra Natale e Capu d’annu. Nascianu ghjuvani pueti, chi cuntrastavanu incù i più anziani e li tenianu capu. Ma ci dumadavamu s’elli ùn eranu micca eccezioni, fenomeni di un ultima rimanenza cume l’ultimu raggiu di u sole primu di a notte.

U primu slanciu l’avianu datu Paulusantu Parigi e Olivier Ancey.

E poi, un annu dopu à l’altru, sò affacati Cristofanu Limongi dettu Titò, Stefanu Conca e Ghjuvanbattista Albertini ; e dopu Ghjuvanfedericu Terrazzoni, « u pasturellu » di Bunifaziu ; e dopu Silvanu Ghjannechini ; e dopu Francescu Luciani ; e dopu Brandone Andreani. Senza cuntà quelli chi, d’un scornu à l’altru di a Corsica, ùn sò ancu affaccati à a luce e chi per u mumentu si tenenu sempre piati tra di elli in certi caffè chi elli soli cunnoscenu.

E quist’annu avemu avutu a meravigliosa surpresa di sente cantà i ghjuvanissimi Petrusaveriu Luciani di Pietralba e Pierre-Ange Martini di Barchetta. So elli, capu à capu, soli in scena, chi hannu apertu u ballu e chi, dopu avè fatu mostra di i so talenti, hannu chjamatu curtesamente l’aziani.

E l’unu apressu à l’altri, i pueti hannu rispostu e hannu fattu u chjerchju nantu à u palcu, puru se certi per spiritu di cuntradizzione o forse per rende u discorsu più stuzzicaghjolu si so tenuti un altura.

Eranu ondeci i pueti : Olivier Ancey, Lozzi ; Cristofanu Limongi, Cervioni ; Francescu Luciani, Ghisunaccia ; Petru Saveriu Luciani, Pietralba ; Pierre-Ange Martini, Barchetta ; Ghjiseppu Micaelli, Ghisunaccia ; Carlinu Orsucci, Tallone ; Petru Santucci, i Pirelli d’Alisgiani ; Anghjulu Simeoni, Marsulinu ; Carlo Storai, Bastia ; Ghjuvanluiggi Villanova, Calinzana.

par Toni Casalonga